Oharrak era kreatibo eta aske batean hartzeko online plataforma egoki bat sortu da: Milanote. Webguneak azaltzen duen bezala, gure ideiak eta proiektuak modu erraz eta erakargarri batean antolatzeko tresna da. Gainera, aplikazio librea eta doanekoa da.
Gure arbel digital pertsonala
Arbel baten papera hartzen du gure pantailan, eta bertan idazten eta txertatzen ditugu gure ohar eta edukiak. Abantaila ugari ditu, adibidez buruan dauzkagun ideia guztiak leku batean elkartzeko aplikazioa da. Gainera, erabilera desberdinak ditu; oharrak idazteaz gain beste eduki batzuk ere txertatu daitezke. Hain zuzen ere, argazkiak eta bideoak ipini ahal ditugu, beste webgune batzuetako testuak, argazkiak edo estekak txertatu eta PDF, Word, Excel eta bestelako formatuak ere erabili daitezke aplikazio honetan.
Ideia bisualak
Gure buruan milaka ideia ditugu eta askotan ideia horiek antolatzeko beharra izaten dugu. Helburu hori betetzeko askok paperezko agenda erabiltzen dute, baina kalera irteten direnean ez dituzte koaderno horiek eramaten, lekua hartzen baitute eta pisutxuak baitira. Hori saihesteko mugikorreko ohar aplikazioak erabiltzen ditugu, eta bertan idazten ditugu gure ideiak.
Oharrak idazteko beste aplikazioekin alderatuz gero, oso desberdina dela ikusi dezakegu. Milanotek ideiak eta oharrak modu bisualean antolatzeko aukera ematen du. Gainera, edukiak harremanetan jarri ahal dira, gezien bidez edota karpeten gainean klik eginez eta beste pantaila batera bidaiatuz. Beraz, oso interaktiboa da, eta edukiak leku batetik bestera mugitu ahal dira.
Elkarbanatzea
Milanotek daukan beste berezitasun bat lagunekin edo lan taldearekin elkarbanatzeko aukera da. Erabiltzaile askok asteko lan planteamendua antolatzeko erabiltzen dute aplikazio hau, eta horregatik lan taldearekin partekatu daiteke esteka baten bidez. Horretaz gain, beste erabiltzaileei proiektu honetan parte hartzeko aukera ematen die Milanotek. Izan ere, oharrak eta edukiak editatu ahal dituzte, baita komentarioak idatzi ere.
Arrakastatsua
Milanote aplikazioak dituen berezitasun eta ezaugarriengatik arrakasta lortuko duela uste dut. Oso erabilgarria da, eta gure behar bat asetzeko sortu da. Erabiltzaile askok sortu dute Milanote kontua, eta youtuben askok gomendatu dute. Hemen uzten dizuet sare sozial honetan hainbatek igo dituzten bideoak.